Tchada Grandi

P - Soss kel ideia di Biker Boys mo ki surgi?
R - É si soss, n'odja alguns rapaz ta fazi e n'gosta. N'tom n'komessa ta tenta fazi, n'bá ta bai, ti ki n'consigui. Dipos bem parci mas colegas ki interessa, kada um ranja si Baika - (Byke). A partid di la nha amigo Milton (Manager di nos grupo), comessa ta trazenu Videos di rapaz ki ta pratika mesmu disportu e nu comessa ta pratika. E assi nu forma kel Grupo Biker Boys.

P - Modi ki surgi kel Nomi Biker Boys?
R - Foi na um tardi ki nu staba tudo reunido ta prepara pa bai pa street - (korri baika), rapaz sugiri pa nu da grupo um nomi. n'ton um Amigo sugiri byker boys, ki é um espressom em ingles, ki signifika Rapaz di Baika.

P - kal ki é maior sonhu di Byker Boys?
R - Nos maior sonhu é konsigui ku kel disportu li, da Jovens um okupassom e konsigui rekupera kes jovens ki sta na mau caminho. Nu ta sunha també um dia odja kel disportu li valorizado pa nos sossiedadi... Tcheu alguem inda ka sabi ma kel ki nu ta pratika é um Disportu, e é tem um nomi - BMX. Nu ta sunha també na um dia tem um espaço propi pa pratika es desportu ki é cima qualquer otu.

P - Modi ki é bu relassom ku elementus di Byker Boys sendu abo Lider di Grupo?
R - N'ta tenta o máximo possivel inssentivas rapaz na pratika kel desportu li, n'ta tenta muralizas na tenta fazi sempri uma mas, na mostras ma és é kapas, apesar di ser um disportu Dificil e ki ta exigi tcheu preparo físiku e téknika... Nta kre odja Jovens sempri na kusas dretu.
BMX é kusa ki n'gosta e ki nta akredita pa podi ser salvassom pa munti Jovens ki sta na mau caminhu.

P - Kal ki é Dika ki bu ta dexa pa tudo pessoal di Bike Boys e pa kes Pessoal ki kre entra na Systema?
R - Dika ki n'ta dexa pa pessoal ki dja é di grupo, é pes ser persistenti e korajosus ki és ta consigui sempri fazi mas... E pa kes ki kre entra na Time, nkre flas pes xinti a vontadi, pes tchiga
na nos e intendi riba di 2 roda kusa ki n'sa fala.